Archivos en la categoría Galicia diversa

Unha presidenta para Galicia

Así mesmo titulei o último artigo publicado en Galicia Confidencial e que podes ler nesta ligazón. Foi escrito a partir das manifestacións celebradas en todo o mundo o 8 de Marzo a prol da eliminación de desigualdades laborais e sociais entre home e muller. En España e en Galicia, as manifestacións polo Día da Muller Traballadora foron realmente importantes. Nós participamos na da Coruña e sentimos formar parte dun evento transcendente, pensamos que aquel día había ser o primeiro dun tempo novo máis xusto e máis lóxico.

Conseguín tirar da cabeza casos como os de Susana Díaz o Cristina Cifuentes e imaxinar como sería Galicia cunha presidenta na Xunta. Nas vindeiras eleccións, darase esa posibilidade. As probabilidades son escasas pero é certo que Ana Pontón ten algunha opción de tornarse a vindeira presidenta do goberno galego. No artigo lístanse os factores que haberían concorrer para facelo posible.

 

Galicia, terra de exemplos

Sen masa crítica. Isto é o que alego no artigo publicado en “Economía digital” hai uns días. Titúlase “Dinahosting como exemplo” e empeza así:

Galicia é un país de exemplos. Podemos mencionar intelectuais de talla mundial, poderosos homes de Estado, deportistas de nivel internacional, artistas de grande éxito no showbusiness. Tamén empresarios que crean riqueza acó e acolá. Temos exemplos, fáltanos masa crítica. Eis a evolución dos nosos números.

Tomemos a poboación activa, variable que reflite coma ningunha outra a actividade económica dun país ou territorio. En 2001 (datos INE), había en Galicia 1.159 mil traballadores activos; en España 18.051 mil. A finais de 2017, eran en Galicia 1.238 mil por 22.765 mil en España. Isto quere dicir que no que levamos de século, a poboación activa galega pasou de representar o 6,42% da española ao 5,44% actual. A economía galega perdeu un punto enteiro de peso sobre a española en apenas 17 anos!!

As cifras meten medo. Todo sinala a nosa progresiva miniaturización económica, xa que logo, tamén social e política. As estratexias de submisión do poder galego ao proxecto centralista español están a provocar a perda de pulso do noso tecido produtivo. A situación de devalo semella imparable. A esperanza concéntrase nos exemplos.

E continúa narrando o caso de Dinahosting, unha empresa compostelá que empezou coma un exercicio dun ciclo de formación profesional e converteuse no líder doméstico en España por número de dominios aloxados. Podes ler o artigo completo na seguinte ligazón.

O gobernador Núñez Feijoo

Fernando de Acuña foi enviado por Isabel a Católica para domesticar, e de paso arruinar, Galicia, territorio hostil.

500 anos despois, temos o trasunto de Fernando de Acuña presidindo a Xunta, a un tal Núñez Feijoo que vén de afirmar que o Estado debe ter máis presenza nas Comunidades Autónomas… A figura do renegado quédalle pequena a este home. Eu atopeino no Corte Inglés hai unhas semanas e sobre ese “encontro” redactei o seguinte artigo:

Feijoo en El Corte Inglés

Que distinta (e mellor e máis feliz e máis orgullosa) sería Galicia se este señor fose, por exemplo, un “jefe de planta” de El Corte Inglés (ou tamén directivo de Inditex).

 

Galicia ten a súa estrela

Após dous meses sen publicar nada, declaro oficialmente a miña incapacidade traumática para manter este blog. Sexa por falta de cousas que dicir, xa for por unha natural desafección cara a estes medios (as RRSS en xeral), o certo e contrastado é que non son capaz de alimentalo como sería necesario. Asumido este feito xa incuestionable, un queda liberado ante quen poida haber do outro lado, se é que aínda queda alguén…

O motivo que me leva a romper este inadvertido silencio vén sendo a difusión do artigo que redactei hai como unha semana para Economía digital. Titúlase “Galicia ten a súa estrela” e trata do valor que está a adquirir Estrella Galicia nestes anos nos eidos económico e social do país. Velaquí deixo parte do contido do artigo:

“A cervexeira do Grupo Hijos de Rivera é máis ca unha empresa de bebidas. Para Galicia representa un motivo de orgullo e identidade, algo que implica un valor fundamental nun país tan orfo de referencias válidas… A Corporación produce e comercializa xa máis de cen artigos pertencentes aos sectores da cervexa, auga, zumes, sidras, vinagres e licores; entre as súas actividades, inclúe tamén servizos varios coma hostalería ou deseño. A facturación total de Grupo en 2017 pode erguerse ata os 450 millóns de euros… A estrutura directa do Grupo ao completo está radicada en Galicia. Unha parte salientable das materias primas –o lúpulo, as uvas, as mazás– proceden de explotacións galegas. En termos de comunicación e marketing, apóstase polo idioma propio e por lemas e mensaxes entendibles en clave de país. Este conxunto de factores explican en certa medida esa identificación xenuína dos produtos co consumidor galego e serven como elemento diferenciador no resto de mercados. Galicia está falta de referencias, de fachos iluminadores, de estrelas que marquen a senda. Velaí a transcendencia e significado do que está a facer o Grupo Hijos de Rivera.”

Dende aquí podes ler o artigo completo. By @pallarego

Dez anos de artigos sobre o rural galego

Co último artigo publicado en Galicia Confidencial, que titulamos Os eucaliptos de Feijoo pero que ben poderiamos telo chamado “A desgraza do eucalipto para o rural galego”, pechamos unha xeira de dez anos publicando achegas sobre o medio rural. En conxunto, son 13 artigos que comezaron con tres colaboracións no hibernado Vieiros entre abril 2007 e maio 2009. Paga a pena volvelas ler e decatarnos de levar dez anos perdidos para a imprescindible transformación do rural galego. Nestes dez anos, iso si, plantáronse moitos millóns de eucaliptos e miles de hectáreas foron ocupadas por esta nefasta especie arbórea chegada das antípodas. Nunca máis lonxe…

Os eucaliptos de Feijoo, en Galicia Confidencial. 24/8/2017

A industria forestal, en Galicia Confidencial. 5/7/2016

Fonte de riqueza segundo o PP, en Galicia Confidencial. 7/4/2016

Ence: política miseria, en Galicia Confidencial. 9/2/2016

Agro miniaturizado, en Economía digital. 3/2/2016

Este país é unha ruina, en Economía digital. 18/10/2015

Un sector lácteo próspero, en Galegos. Setembro 2015

Sen reaccion no rural galego, en Economía digital. 28/11/2014

A paisaxe en Europa, en Galicia Confidencial. 14/5/2014

Lumes e lumes, en Galicia Confidencial. 3/9/2013

O rural, a solución: quen o ía dicir, en Vieiros. 11/5/2009

SOS rural galego, en Vieiros. 7/12/2007

Sen cambios na paisaxe, en Vieiros. 18/4/2007

by @pallarego

Carta aberta ao presidente da Xunta 

Sr. Núñez Feijóo:

Vostede, como calquera outro cidadán que viaxe polo país adiante, terá contemplado a destrución que sofre a paisaxe galega pola invasión masiva e acelerada do eucalipto. Sabe que en apenas unhas poucas décadas, esta especie chegada de Australia tornouse a árbore hexemónica do territorio galego. Coñece tamén, ou debería, que nese mesmo período, a superficie agraria no país reduciuse de modo notable e outrosí a cota de mercado do noso produto agroalimentario.

Vostede, así o parecen indicar as súas repetidas declaracións públicas nos últimos meses, leva tempo dándolle voltas á política forestal de Galicia. Teñen no caixón un borrador de Lei e prevén ademais crear unha Axencia Forestal. A sentenza que repite con máis frecuencia é “racionalizar a superficie ocupada polo eucalipto observando as necesidades da industria”. Debe saber que a frase agocha un oxímoron: a industria forestal galega pretende continuar espallando a presenza do eucalipto mesmo en contra do medio natural e da economía de Galicia.

Vostede, que debe valorar a transcendencia de conservar as esencias que configuran a identidade deste país, ha saber que o eucalipto xa modificou drasticamente a paisaxe –e a fauna e flora– das provincias de A Coruña e Pontevedra así como do norte de Lugo, mentres que as bisbarras do interior empezan a sufrir as primeiras escaramuzas da especie australiana. Mesmo zonas de elevado valor medioambiental encóntranse en proceso de deturpación, nalgúns casos incipiente e noutros incluso avanzado.

Vostede, que como presidente buscará o progreso económico e social de Galicia, ha saber que en contra das manifestacións simples e intereseiras, o eucalipto só trae miseria non só ambiental e paisaxística; tamén económica. Calquera das grandes potencias madereiras de Europa exclúe o eucalipto entre as especies que explota. O caso galego, canda o portugués, son exemplos únicos no mundo de monocultivo forestal con especies alóctonas ou alleas ao seu medio propio. Ha saber que o cultivo de especies autóctonas e a potenciación da produción agraria sería notablemente máis produtivo para a economía galega –para o noso desenvolvemento– que a plantación masiva de eucalipto, o cal se dedica a pasta de papel e outros produtos sen valor engadido.

Vostede, que conta cun nutrido equipo de técnicos e asesores, debe saber que, con moi honrosas excepcións, o sector madeireiro galego compite principalmente a partir do acceso barato á madeira e que o seu obxectivo é reducir aínda máis os custos mediante o espallamento sen límites nin control do eucalipto. Vostede é consciente da presión que a industria está exercendo para convencer o seu goberno de paralizar as “medidas de racionalización”. Deica vostede seguramente teñan chegado manifestacións públicas de representantes do sector segundo as cales o futuro no interior do país pasa “polo eucalipto ou pola pobreza”, nun exemplo insólito de obcecación e extravío.

Vostede, cuxas decisións son fundamentais para o futuro deste país, ha ter en conta que máis do 80% das árbores que se plantan en Galicia son eucaliptos. E que de seguir esta progresión, o medio natural galego se terá convertido nun inmenso eucaliptal en poucas décadas. Con iso, Galicia renunciaría á súa identidade, á conservación do medio propio, á fonte básica da súa riqueza e ás súas posibilidades de desenvolvemento e progreso.

Vostede, que semella querer preservar o medio natural galego fronte á estratexia de depredación, debe saber que as normas que o seu goberno pretende implantar contra a posición da industria, non son suficientes en absoluto. O campo galego debe representar un grande proxecto de riqueza a partir da potenciación das súas enormes capacidades. E para iso, un requisito fundamental será reducir dun xeito drástico a presenza do eucalipto. Hai que paralizar a súa plantación pero ademais hai que eliminar os exemplares que invaden bosque outrora autóctono, que ocupan terreo de potencial produción agrogandeira e que deturpan as zonas de valor ambiental e paisaxístico.

Vostede, Sr. Núñez Feijóo, debe decidir: se dobrarse ante a posición da industria e deixar que estas empresas continúen competindo nos tramos baixos do sector a partir dunha materia prima barata e abundante, ou pensar no futuro do país, recuperar o terreo entregado ao eucalipto e articular de vez unha política de desenvolvemento económico e social a partir das grandes potencialidades do rural galego.

Artigo publicado en Galicia Confidencial by @pallarego

O Poder da Colaboración

Somos pequenos e habemos competir en mercados grandes. Somos febles e habemos sobrevivir nun mundo moi duro. Somos poucos e habemos destacar entre enormes aglomeraciones. Somentes nos queda un camiño, o da UNIÓN, o da suma de recursos e capacidades, de sinerxias e de complementariedades. Quédanos a saída da COLABORACIÓN, entre nós e mais con que sexa conveniente.

A Economía galega necesita un xiro a prol de cooperación entre as súas empresas. Velaquí o meu artigo completo publicado no suplemento de Ideas de Economía digital: O poder da Colaboración.

 

Dous artigos sobre a marca Galicia

O desprezo da marca

Eroski mercou Vegalsa hai algúns anos. Diríase que se trataba dunha mala nova para a economía galega. Non tanto como a adquisición de R por parte de Euskaltel. Ou como a do Pastor polo Popular. Ou como a de Fenosa por Unión Madrileña décadas atrás. Calquera operación que signifique perda de postos de traballo e da capacidade de investimento e xestión. Mais en contra das perspectivas, Eroski trouxo algo que nós tendemos a desprezar: o respeto pola marca Galicia. Dende o principio, aumentou significativamente os provedores galegos, sinalou de xeito inequívoco aqueles artigos producidos ou empaquetados en Galicia e utilizou con forza o idioma galego. Gadis, aínda co capital en mans de empresarios do país, podería tomar nota.

Velaquí a ligazón ao artigo completo publicado en Economia digital.

Abrollos verdes

“Diferenciación, creatividade, calidade e distribución son os elementos da fórmula de éxito. Tamén o uso da lingua propia; a maioría utiliza o galego como idioma de comunicación. Saben que as linguas autóctonas supoñen un valor engadido para o consumidor do país e un carimbo de autenticidade ante o foráneo.” Iso mesmo di o artigo publicado en Galicia Confidencial (aquí a ligazón) falando da xeira de bos proxectos que se dan cita cada dúas semanas no Mercado ecolóxico da Praza de España da Coruña. Tal como anticipaba o título do artigo: abrollos verdes, que habelos, hainos.

 

 

Un par de artículos más

Quen ía a pensar que un artigo sobre eucaliptos tería a repercusión que conseguiu este: “Galicia, de paraíso natural a inmenso eucaliptal en unas pocas décadas“. Nada menos que 4.600 veces foi compartido. Espero que sexa o reflexo da preocupación existente sobre a proliferación, auténtica invasión, desta árbore alóctona sobre a paisaxe e o desenvolvemento rural de Galicia. Asimesmo espero que o artigo sirva para empurrar sequera un chisco na dirección correcta: a de reducir a presenza do eucalipto nestas terras.

E igualmente en Mundiario, una nueva colaboración con Donald Trump de sujeto principal. El artículo tiene dos partes: la primera, que cuestiona la legitimidad del nuevo presidente USA para tomar las decisiones que se le antojen; la segunda, la resistencia de una sociedad civil que se moviliza ante tanto despropósito. Aquí queda el vínculo al artículo: La sociedad civil reacciona ante los desmanes presidenciales de Donald Trump.

 

O textil galego en apuros

A empresa coruñesa de confección Caramelo atópase en proceso de liquidación. Antes tamén quebraran Antonio Pernas, a ferrolá Unicén, a ordense Viriato, a boirense Jealfer (que tenta agora renacer) ou as lalinenses Toypes e Montoto. Outras empresas galegas do sector téxtil estiveran a piques de pechar as portas, como Selmark ou Guerral, mentres que firmas tan acreditadas como Adolfo Domínguez, Kina Fernández, Roberto Verino ou Alba Conde viviron (e algunha segue a vivir) momentos extremadamente delicados. 

No artigo que vimos de publicar en Economía digital “Os restos do textil galego” preguntámonos: “Por que hai quince anos si e hoxe non? É que as marcas Inditex barren con todo? É que o modelo, se hai un identificable, peca de erros estratéxicos insalvables? É que as equivocacións tácticas e de xestión son contaxiosas? Cal é a razón da desfeita?”

Seica unha desas razóns son os custos de distribución que implica a creazón dunha rede de tendas de marca propia. Disque dispara o efecto imaxe e incrementa o cota do mercado. Mais de que serve se afoga as finanzas das empresas? Entón é cando un apela ao espírito da cooperación, que tende a aforrar custos ao tempo que potencia a implantación no mercado. Non sería posible unha alianza entre as máis senlleiras firmas galegas de moda para lanzar unha estratexia conxunta de comercialización? Sería tan disparatado crear unha rede de tendas multimarca onde se ofrecesen as roupas de, poñamos, Adolfo Domínguez, Alba Conde, Antonio Pernas, Bimba e Lola, Caramelo, Florentino, Kina Fernández, Roberto Verino e Viriato?

Velaquí queda a proposta, que a ninguén con capacidade de manobra chegará seguramente. E velaquí deixo de novo ligazón ao texto do artigo xa citado: “Os restos do textil galego“.